2-வது சுற்றுக்கு முன்னேறிய இங்கிலாந்து, அர்ஜென்டினா, போலந்து, ஆஸ்திரேலியா
உலகக் கோப்பை கால்பந்து போட்டியில் இங்கிலாந்து, அர்ஜென்டினா, போலந்து அணிகள் 2வது சுற்றுக்கு முன்னேறியுள்ளன.
22-வது உலகக் கோப்பை கால்பந்து போட்டி கத்தாரில் நடந்து வருகிறது. இதில் பங்கேற் றுள்ள 32 அணிகள் 8 பிரிவாக பிரிக்கப்பட்டுள்ளன. ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் முடிவில் ஒவ்வொரு பிரிவிலும் ‘டாப்-2’ இடங்களை பிடிக்கும் அணிகள் 2-வது சுற்றுக்கு (ரவுண்ட் 16) தகுதி பெறும்.
இதில் 10-வது நாள் நள்ளிரவில் ‘பி’ பிரிவில் ஒரே நேரத்தில் இரண்டு லீக் ஆட்டங்கள் அரங்கேறின. அகமது பின் அலி ஸ்டேடியத்தில் நடந்த ஒரு ஆட்டத்தில் உலக தரவரிசையில் 5-வது இடத்தில் உள்ள இங்கிலாந்து அணி தனது அண்டை நாடான வேல்சை சந்தித்தது. விறுவிறுப்பான இந்த ஆட்டத்தில் தொடக்கம் முதலே தாக்குதல் பாணியை தொடுத்த இங்கிலாந்து ஆதிக்கம் செலுத்தியது. அந்த அணியின் கட்டுப்பாட்டில் தான் பந்து அதிக நேரம் (65 சதவீதம்) வலம் வந்தது. மார்கஸ் ராஷ்போர்டு அடித்த அருமையான ஷாட்டை வேல்ஸ் கோல்கீப்பர் டேனி வார்ட் தடுத்து நிறுத்தினார். முதல் பாதியில் கோல் எதுவும் விழவில்லை.
பிற்பாதியில் இங்கிலாந்து அணியினர் தங்களது தாக்குதல் வேகத்தை அதிகரித்தனர். அதற்கு உடனடியாக பலன் கிடைத்தது. 50-வது நிமிடத்தில் இங்கிலாந்து அணி முதல் கோல் அடித்தது. ‘பிரீகிக்’ வாய்ப்பில் தடுப்பு அரண்களை தாண்டி மார்கஸ் ராஷ்போர்டு பிரமா தமாக கோல் அடித்து அசத்தினார். அடுத்த நிமிடத்திலேயே இங்கிலாந்து அணி 2-வது கோலை போட்டது. கேப்டன் ஹாரிகேன் கடத்தி கொடுத்த பந்தை சக வீரர் பில் போடென் கோல் வலைக்குள் திணித்தார்.
56-வது நிமிடத்தில் வேல்ஸ் வீரர் கிப்பெர் மூர் கோல் வலையை நோக்கி அடித்த வலுவான ஷாட்டை இங்கிலாந்து கோல் கீப்பர் ஜோர்டான் பிக்போர்டு தடுத்தார். 68-வது நிமிடத்தில் இங்கிலாந்து வீரர் மார்கஸ் ராஷ்போர்டு மீண்டும் கோல் அடித்தார். சக வீரர் கால்வின் பிலிப்ஸ் தட்டிக்கொடுத்த பந்தை ராஷ்போர்டு இடது காலால் உதைத்தார். அது எதிரணி கோல் கீப்பரின் காலில்பட்டு கோல் வலைக்குள் புகுந்தது. இது உலகக் கோப்பை போட்டிகளில் இங்கிலாந்து அணியின் 100-வது கோலாக அமைந்தது. இதன் மூலம் இந்த மைல்கல்லை எட்டிய 7-வது நாடு என்ற பெருமையை இங்கிலாந்து பெற்றது. முடிவில் இங்கிலாந்து அணி 3- 0 என்ற கோல் கணக்கில் வேல்சை தோற்கடித்து 2-வது வெற்றியை தனதாக்கியது.
‘பி’ பிரிவில் லீக் சுற்று முடிவில் இங்கிலாந்து (2 வெற்றி, ஒரு டிரா 7 புள்ளி) முதலிடமும், அமெரிக்கா (ஒரு வெற்றி, 2 டிரா, 5 புள்ளி) 2-வது இடமும் பிடித்து 2-வது சுற்றுக்கு தகுதி பெற்றன. ஈரான் (ஒரு வெற்றி, 2 தோல்வி, 3 புள்ளி) 3-வது இடமும், வேல்ஸ் (ஒரு டிரா, 2 தோல்வி 1 புள்ளி) கடைசி இடமும் பிடித்து வெளியேறின. 2-வது சுற்றில், ‘ஏ’ பிரிவில் முதலிடம் பிடித்த நெதர்லாந்து அணி, ‘பி’ பிரிவில் 2-வது இடம் பெற்ற அமெரிக்காவை எதிர்கொள்கிறது. வருகிற 3-ந் தேதி இரவு 8.30 மணிக்கு இந்த ஆட்டம் நடக்கிறது. ‘பி’ பிரிவில் முதலிடம் பிடித்த இங்கிலாந்து , ‘ஏ’ பிரிவில் 2-வது இடம் பெற்ற செனகல் அணியை சந்திக்கிறது. 4-ந் தேதி நள்ளிரவு 12.30 மணிக்கு இந்த ஆட்டம் நடக்கிறது.
நேற்று நள்ளிரவு தோகாவில் உள்ள லூசைல் ஸ்டேடியத்தில் நடந்த ‘சி’ பிரிவு லீக் ஆட்டத்தில் போலந்து மற்றும் அர்ஜென்டீனா அணிகள் மோதின. பரபரப்பான தொடங்கிய ஆட்டத்தின் முதல் பாதியில் இரு அணிகளும் கோல் எதுவும் அடிக்கவில்லை. தொடர்ந்து நடைபெற்ற இரண்டாவது பாதியின் 46வது நிமிடத்தில் அர்ஜென்டினா வீரர் அலெக்சிஸ் மேக் அலிஸ்டர் கோல் அடித்து தனது அணியை முன்னிலை பெறச் செய்தார். பின்னர் 67வது நிமிடத்தில் ஜூலியன் அல்வரெஸ் ஒருகோல் அடித்து அர்ஜென்டினா வெற்றியை உறுதி செய்தார்.
கூடுதல் நேரம் வழங்கப்பட்ட நிலையில் போலந்து அணியால் கோல் எதுவும் அடிக்க முடியவில்லை. பின்னர் ஆட்ட நேர முடிவில் 2-0 என்ற கோல்கணக்கில் வெற்றி பெற்ற அர்ஜென்டினா புள்ளி பட்டியலில் முதல் இடம் பிடித்தது. இரண்டாவது இடத்தை போலந்து அணி பிடித்தது. இதன்படி சி பிரிவில் இடம்பெற்றிருந்த அர்ஜென்டினா, போலந்து அணிகள் அடுத்த சுற்றுக்கு முன்னேறியுள்ளன. இது இருநாட்டு ரசிகர்களையும் மகிழ்ச்சி அடையச் செய்துள்ளது.
அல்வக்ராவில் உள்ள அல் ஜனாப் மைதானத்தில் நடந்த மற்றொரு ஆட்டத்தில் கட்டாய வெற்றி நெருக்கடியுடன் ஆஸ்திரேலியா- டென்மார்க் அணிகள் மல்லுகட்டின. பந்து கணிசமான நேரம் (69 சதவீதம்) டென்மார்க் பக்கமே சுற்றினாலும் பலன் இல்லை. 60-வது நிமிடத்தில் பந்துடன் தனி வீரராக முன்னேறிய ஆஸ்திரேலியாவின் மேத்யூ லெக்கி, எதிரணியின் முன்கள வீரர்களுக்கு போக்கு காட்டி விட்டு சூப்பராக பந்தை வலைக்குள் செலுத்தினார். அதே முன்னிலையை கடைசி வரை தக்க வைத்த ஆஸ்திரேலியா 1-0 என்ற கோல் கணக்கில் டென்மார்க்கை தோற்கடித்து, 16 ஆண்டுக்கு பிறகு 2-வது சுற்றை அடைந்தது.
‘டி’ பிரிவில் லீக் சுற்று முடிவில் பிரான்ஸ் (2 வெற்றி, ஒரு தோல்வியுடன் 6 புள்ளி), ஆஸ்திரேலியா (2 வெற்றி, ஒரு தோல்வியுடன் 6 புள்ளி) ஆகிய அணிகள் டாப்-2 இடங்களை பிடித்து அடுத்த சுற்றுக்குள் நுழைந்தன. துனிசியா (ஒரு வெற்றி, ஒரு தோல்வி, ஒரு டிராவுடன் 4 புள்ளி), டென்மார்க் (ஒரு டிரா, 2 தோல்வியுடன் ஒரு புள்ளி) அணிகள் வாய்ப்பை இழந்து வெளியேறின.