ஈரோட்டில் ஸ்டாலின் – எடப்பாடி பழனிசாமி போட்டி பிரச்சாரம்

ஈரோடு கிழக்கு தொகுதியில் இன்று முதலமைச்சர் ஸ்டாலினும், அண்ணா தி.மு.க. இடைக் கால பொதுச் செயலாளர் எடப்பாடி பழனிசாமியும் வீதிவீதியாக சென்று போட்டி போட்டு பிரச்சாரம் செய்தனர்.

ஈரோடு கிழக்கு தொகுதிக்கு வரும் 27-ம் தேதி ஓட்டுப்பதிவு நடைபெறுகிறது. இந்த தேர்த லில் ஈ.வி.கே.எஸ். இளங்கோவன் (காங்கிரஸ்), கே.எஸ்.தென்னரசு (அ.தி.மு.க.), மேனகா நவநீதன் (நாம் தமிழர்), ஆனந்த் (தே.மு.தி.க.) உள்பட 77 பேர் போட்டியிடுகின்றனர். இதில் ஈ.வி.கே.எஸ்.இளங்கோவனை ஆதரித்து காங்கிரஸ் கட்சியினர் பிரசாரம் செய்தாலும் தி.மு.க.வினர் தான் அதிகம் பேர் அங்கேயே முகாமிட்டு தீவிரமாக தேர்தல் பிரசாரம் செய்து வருகின்றனர்.

அமைச்சர்கள், எம்.பி.க்கள்., எம்.எல்.ஏ.க்கள், மாவட்ட கழக செயலாளர்கள், மேயர்கள், வாரியத் தலைவர்கள், அணிகளின் நிர்வாகிகள், வட்ட பகுதி கழக செயலாளர்கள் என ஏராளமானோர் சென்று முகாமிட்டு கடந்த ஒரு மாதமாக தேர்தல் வேலைகளில் ஈடுபட்டு வருகின்றனர். இன்றுடன் தேர்தல் பிரச்சாரம் ஓய்கிறது. இந்நிலையில், முதலமைச்சர் மு.க.ஸ்டாலின் இன்று ஈரோட்டில் ஈ.வி.கே.எஸ்.இளங்கோவனை ஆதரித்து வீதிவீதியாக பிரசாரம் செய்தார். இதற்காக நேற்று மாலை சென்னையில் இருந்து விமானம் மூலம் கோவை சென்று அங்கிருந்து கார் மூலம் ஈரோடு சென்று சக்தி சுகர்ஸ் விருந்தினர் மாளிகையில் தங்கினார்.

இன்று ஈரோடு கிழக்கு தொகுதிக்குட்பட்ட பல்வேறு பகுதிகளில் முதலமைச்சர் மு.க. ஸ்டாலின் வீதிவீதியாக சென்று மக்களிடம் ஆதரவு திரட்டினார். காலை 9 மணி அளவில் விருந்தினர் மாளிகையில் இருந்து பிரசார வேனில் புறப்பட்டு முதலமைச்சர் மு.க. ஸ்டாலின் பெரிய வலசு, பாரதி தியேட்டர், சக்தி ரோடு பஸ்நிலையம், மெட்ராஸ் ஓட்டல், மஜீத் வீதி வழியாக சென்று சம்பத் நகர் பகுதியில் பிரசாரம் செய்தார். அதன் பிறகு கே.என்.கே. ரோடு, மூலப்பட்டறை, பவானி ரோடு வழியாக சென்று காந்தி சிலை அருகே பிரசார வேனை நிறுத்தி அங்கு திரண்டிருக்கும் மக்களிடையே பேசினார்.

இதன்பிறகு பூம்புகார் நகர், காந்திநகர், வல்லரசம்பட்டி வழியாக அக்ரஹாரம் சென்று பிரசாரம் செய்தார். அத்துடன் காலை பிரசாரத்தை முடித்துக் கொண்டு மதிய சாப்பாட் டுக்கு பிறகு முதலமைச்சர் மு.க.ஸ்டாலின் மீண்டும் மாலையில் ஈ.வி.கே.எஸ். இளங்கோ வனை ஆதரித்து பிரச்சாரத்தில் ஈடுபடுகிறார். மாலை 3 மணி அளவில் சம்பத் நகர், அம்மு மெஸ் பிரிவு, சின்னமுத்து வீதி வழியாக சென்று முனிசிபல் காலனி அருகே வேனில் இருந்தபடி பேசுகிறார். அதன்பிறகு மேட்டூர் ரோடு, பன்னீர் செல்வம் பூங்கா வழியாக சென்று பெரியார் நகரில் பிரசாரம் செய்து ‘கை’ சின்னத்துக்கு ஓட்டு கேட்கிறார். அத்துடன் தனது இறுதிக்கட்ட பிரசாரத்தை முடித்துக்கொண்டு சக்தி சுகர்ஸ் விருந்தினர் மாளிகைக்கு சென்று அங்கிருந்து பின்னர் சென்னை புறப்படுகிறார்.

இதேபோல் அண்ணா தி.மு.க. வேட்பாளர் கே.எஸ். தென்னரசை ஆதரித்து எடப்பாடி பழனிசாமி இன்றும் ஈரோடு தொகுதியில் இறுதிக்கட்ட சூறாவளி பிரசாரம் செய்கிறார். குருசாமி கவுண்டர் மண்டபத்தில் இருந்து பிரச்சாரத்தை அவர் துவக்கினார். வீரப்பம் பாளையம், பண்ணைக்காடு, கணபதி நகர் உட்பட பல்வேறு இடங்களில் வீதிவீதியாக சென்று பிரச்சாரம் செய்யும் எடப்பாடி பழனிசாமி பெரியார் நகர் ஆர்ச் நால்ரோட்டில் பிரச்சாரத்தை முடிக்கிறார்.